ABŞ Energetika Nazirliyinin verdiyi statistik məlumatlara istinad edərək deyə bilərik ki, dünyanın böyük neft və neft məhsulları istehsalçıları 2007-ci ildə neft ixracını 2,5% azaldıblar. Bununla yanaşı idxalçıların neftə olan tələbatı daima artır, neftin qiymətləri isə bir ildə 57% artıb. Bu isə öz növbəsində neft ixracatçılarına yüksək mənfəət əldə etməyə imkan verir. Amerika statistikasının məlumatına əsasən ixracın azalma meyli 2008-ci ildə də dəyişməyəcək. 

“The Wall Street Journal” qəzeti neft ixracının azalmasını bir neçə səbəblə əlaqələndirir. Birincisi, bir çox neft ixrac edən dövlətlər dünya bazarındakı yüksək qiymətlər sayəsində əldə etdikləri üstün gəlirlə sürətlə inkişaf etməyə başlayırlar. Buna görə də daxili tələbatı ödəmək məqsədilə onlara böyük həcmdə neft lazımdır. İkincisi, neft yataqlarında hasilatın azalması və investisiyaların lazımi kəmiyyətdə olmaması Meksikada, Norveçdə və Rusiyada neft ixracının azalmasına səbəb oldu. Bundan başqa, bu yaxınlarda OPEK bəyan etdi ki, neft hasilatına olan kvotaları artırmaq niyyətində deyillər.

Son aylar dünya bazarında neftin qiyməti rekord templərlə artaraq hər barrelə görə 130-135 dollara çatıb. ABŞ da daxil olmaqla, bir çox inkişaf etmiş ölkələr öz neftini hasil etmədiyinə görə neft ixrac edən ölkələrdən neftin hasilatını artırmağı tələb edirlər. Neft ixracatçıları isə bəyan edirlər ki, neftin qiymətinin qalxmasının əsas səbəbini bazarda neftin çatışmamasında yox, qeyri-stabil dünyada axtarmaq lazımdır.